أعشق الأسئلة أكثر من المكرونة بالبشاميل
( بالمناسبة هما ليه سموها باشاميل ؟ ! )،
لأن الأسئلة هي الدليل الوحيد على أن الإنسان لديه عقل يعمل
وعلى أنه يمتلك عقلاً أصلاً .
ويلا بينا كل واحد يشغل الجمجمة ويحاول يلاقى اجابة على الأسئلة دي
§ الكهرباء لما بتتقطع بتروح فين ؟ !
§ لو فيه شجرة وقعت على الأرض فى الغابة، هل بقية الشجر هيضحكوا عليها ؟
§ ليه في شارع مراد حاطين يافطه كبيرة مكتوب عليها
" ابتسم انت في الجيزة "..، هل الجيزة حاجة تضحَّك ؟ !
§ لما تطلب ساندوتش من مطعم وتحب تضيف عليه اى إضافة بيزودوا سعر الساندوتش، طيب ليه لما بتحب تشيل حاجه من محتويات الساندوتش سعره ما بيقلش ليه ؟
طيب لو كان الحب اعمى .. ليه واكلين دماغنا
بالحب من اول نظرة ؟
§ لو إسمك (ماجد) وطلعت طيّار، هتفضل مستحمل قد ايه الناس وهيا بتندهلك ( كابتن ماجد ) ؟
§ ليه بيقولوا على الشخص اللى نايم بعمق إنه نايم زى البيبيهات ؟، مع إن البيبيهات أصلا بيصحوا كل نص ساعة !
§ معروف إن ( اللي يتلسع من الشوربة ينفخ في الزبادى )، بس .. هل لو ( نفخت في الزبادى ) يبقى دا معناه إني ( إتلسعت من الشوربة ) ؟ !
§ إذاي لما اسأل عن مقر النادي الأهلي فين،
الاقي الإجابة.. النادى الأهلى في الزمالك ؟ !
§ ليه لو واحد قال قدامي كلمة " الأقصر " بتيجي في دماغي على طول صورة " الآثار " ؟ ! مع إنى لو قال قدامي كلمة " الآثار " مش شرط تيجي في دماغي صورة " الأقصر " ؟ !
§ ليه الشامبو بيبقى بالخوخ الطبيعى بينما عصير الخوخ بيبقى معمول بنكهة الخوخ ؟
§ ليه لمّا الواحد يكون واقف مستنى الأسانسير بعد ما داس على الزرار اللي بيستدعى الأسانسير وبقى منور وباين إنه منوّر، ييجي واحد تاني بعد ثواني يبص لك ويبص للزرار المنور ويروح دايس على الزرار تاني ؟ !
§ لما تيجي تتصل بواحد.. ليه الأرقام اللي بترد غلط.. ما بتكونش مشغولة ؟
§ لو كانت الأرض كرة – زى ما بيقولوا – طيب الماتش هيبدأ إمتى ؟ !
§ ليه بيكلبشوا العربية اللي واقفة صف تاني وقافله الشارع.. مع إن الشارع بعد الكلبشة بيفضل مقفول برضه ؟ !
§ لو الصاعقة نزلت على حد بيموت متكهرب فورا، طيب لمّا الصاعقة بتضرب البحر، ليه السمك اللى فى البحر مابيموتش متكهرب ؟
§ لو البوليس وهو رايح يقبض على حد شاف فى السكة جريمة بتحصل ، بيمنعها ولاّ بيركز فى المهمة اللي طالع علشانها ؟
§ طيب هل حصل فعلا فى يوم من الأيام أن فيه واحد
( ضرب عصفورين بحجر ) ؟
§ ليه لما تسأل واحد على العنوان وتقول له
" شارع كذا فين ؟ ! " يرد عليك بسؤال " هما قالوالك فين ؟ ! ". طيب ما هما لو كانوا قالوا لي ماكنتش سألتك،
§ ليه الناس في الشارع بتستخدم أدوات نداء لتوقيف أي شخص، أدوات نداء مالهاش أصل في اللغة و ينفع تنادي بيها على أي أحد في المطلق ذى.
( بسست، والنبى يا، ويا كابتن، وباقولك . وخُد يا، وأيوه يا ) ، وليه أدوات النداء دي بتوقف الشخص المقصود بالذات ؟ !
§ ليه المذيعة دايما بتتمنى لنا وقت ممتع مع الفيلم العربي اللي بيتذاع للمرة الألفين.. وهى عارفة كده كويس ؟ !
§ طيب ليه المذيعة بتقول أعزائي أفراد الأسرة.. وهى ما تعرفش حد فينا ؟ !
§ اللى مايقدرش يتكلم ( اخرس ) ، واللى مايقدرش يشوف ( اعمى ) ، طيب اللى مايقدرش يشم أيه ؟
§ ليه الكتابة على التي شيرت لازم تكون بالإنجليزي، ليه ماحدش بيكتب على التي شيرت بتاعه بالعربي .. مثلاً
" الدنيا برد ".
§ لو " رُكب " الإنسان كانوا ورا مش قدام، كانت الكراسى هتبقى شكلها إيه ؟
§ ليه الواحد بيدوس على الريموت كنترول بقوة وعنف لما الحجارة بتشطّب ؟
§ لمّا البوليس بيهجم على شقة ويكسّر الباب،
مين المسئول إنه يصلّح الباب ده ؟
أسئلة تحتاج إلي تفكير بعمق - بس أوعي تغرق
# كنتم مع مقالات الدليل الوحيد على أن الإنسان لديه عقل
